Мумијата, за која научниците претпоставуваат дека потекнува од периодот пред Инките, е откриена во археолошкиот комплекс Кахамарки, кој се наоѓа источно од Лима, а се верува дека потекнува од културата Чакја, пренесува Ројтерс.
Мумијата би можела да биде стара помеѓу 800 и 1.200 години, што подоцна ќе се утврди со радиокарбонска анализа, забележуваат археолозите. Таа е пронајдена во фетална положба, врзана со јажиња, во овална подземна погребна структура.
Extraordinarily #creepy mummy enveloped in ropes found in Peru https://t.co/olOatSOXGk pic.twitter.com/7OcraTTso9
— AmericasMostHaunted (@amhaunted) November 27, 2021
„Во средината на овој мал плоштад најдовме подземна погребна структура, веднаш под нас. Внатре најдовме мумија од времето пред Инките. Мумијата е опкружена со низа погребни садови, како што се саксии, керамика, остатоци од растенија и камени алатки. Главната карактеристика на мумијата е тоа што целото тело ѝ е врзано со јажиња, а рацете ѝ го покриваат лицето, што е локален погребен обичај“, вели професорот Питер Ван Дален Луна од државниот универзитет, Сан Маркос.
Во Перу има стотици археолошки локалитети од периодот на културите кои се развиле пред и по цивилизацијата на Инките, кои доминирале во јужниот дел на Јужна Америка пред 500 години, од јужен Еквадор и Колумбија до централно Чиле.
Според локалните медиуми, археолозите се надеваат дека ова откритие ќе фрли ново светло на културата на Чакја.
